Shillong-a College ka kai lai khan kum 2000 Xmas hmang turin ka Pa’n min chah haw a. Xmas leh a boruak lai a ni bawka tlai khat ka leng haw kan chaw ei tur chu ka U hian “Hey, eng rim nge i nam?” min lo tia, kei lah pek chuan ‘a nant piauh-si’ ka ti maia ‘chu chu eng nge?’ tiin min zawt nawn leha ‘a rim rehna’ tiin ka chhang ve leh ta mai bawka. Eng rim rehna maw tiin min zawt nawn leh ta fova ‘Zu rim, zu rim rehna’ ka ti bulhmuk a, a ni lo ‘Zu rim’ a nih hi a la ti fan a.
Ka nu hnenah a zualko zuia a rim rehna (a-nant piauh-si) rim chu Zu rim zawk emaw an lo ti ni awm tak a ni. A rim rehna rim pawh Zu rim emaw an lo ti dawn tho tih chu hria lawk ila in bum loh law law kha a fingthlak zawk tur. Tichuan, a zan vekah tuna kan Library awmna tualah hian PYF (V/ch) thalai khan intihhlimna (Fellowship) kan neia, buai palh a awm loh nan tiin Gate vengtu an dah a (chu chu zu rim nam luh phal loh tih a ni) Zu hi a mak ve khawpa mahnin lo in tawh chuan midang zu rim nam hi a hriat theih der lo maia Gate vengtu khan min lo hnim deuh suk suk teh naa hriat ngaihna awm hek lo le ‘a nant piauh-si’ ei dun ve ve kha kan ni miau va a nuihzat thlak mah zawk! Chu lam chu ka sawi tum tak phei zawng a ni lova ka han sawi duh zawka chu ka chhungte ang maia ‘a-nant piauh-si’ pawh Zu rim emaw ti ve ngai lo “Zu rim dik tak hria thei Motor”a ni.
Khawvelah nitin mai hian mi za tel tak meuh hian Zu avanga Motor accident tuar an awma. Car accident.com in a sawi dan chuan awi harsa khawpin USA ah khuan Motor accident a tama nitin mi 115 vel zel an thia (US ah State 50 a awma State khatah nitin mi 2 aia tam Motor accident vangin an thi tihna a ni) chu chu minute 13 dan zelah mipakhat thi ang an ni a. Kum 2005 khan USA ah chauh Car accident vawi 6,420,000 a awma, inhliam 2.9 million an awma 42,636 in an thih phah bawk a ni. Car accident vanga Car chhia zawng zawng hi 230 billion man hu vela chhut a ni a. World Health Organization in an record dan chuan khawvel pumpuiah nitin mi 3,000 velin Car accident vangin thihna an tawk bawk a ni. A rap thlak mang e! Dawt ka sawi chu a ni em lo maw?
Australia hi khawvela car accident tamna ber ram 10 ziangah a tel ve a. Kum 2008 khan Car accident vangin mihriang 1,464 in an thih phaha mihring nuai khat dawnin hliam an tuar phah bawk. Australia ram chhungah chuan New South Wales leh Victoria State te hi Car accident tamna State a ni. Australia State zingah South Australia State hi Car accident tamna pawl a nia a tam ber erawh a ni lo nain Statistic ka hmuh theih chhun ber a nih vangin har tar lang ve ila. South Australia State ah hian ni 2/3 dan ah Car accident vangin mi pakhat ang zel an thia nitin mi 20 chuangin hliam an tuara an zingah mi 4 ang hu chu damdawi in thlenpui an ni. Kan chenna Victoria State (Melbourne) ah pawh hian TV(news) han en ila news an update (dar kar tina chanchin thar puang)a piang Car accident hi hmuh tur a awm fo bawk thin a ni. Car accident 100 zela 87 (87%) chu Zu ruih vang a ni a adang chu Motor khalh laia phone biak (mobile) biak vangte, chak lutuk (speed over) vangte..etc an ni.
Sap ho Zu an rui ngai lo an lo tih thin kha a ni aw zawng lo mai! A in tu an tam leh an in tam dan a zira teh a nih erawh chuan ka hria lo. Zu ruih vanga accident an tam bera accident avanga thi an tam ber bawk awm e. Chuvangin Traffic Police te hian ngawrh takin an duty-a Zu ruia Motor khalh ni awm an hmuh chuan Alcahol Breath Teste (thil an ham tira zu an lo in a nih chuan a lo lang mai) an neih tira 1.5 mil (zu lo in pawh ni se 1.5 a pelh loh chuan ngaihdam a ni/ a zu in khan a ngaihtuahna a ti buai pha lova ngaih a ni) a pelh chuan pawisa an chawtir emaw a Driving Licence an laksak emaw, kawng sirah an din tira a chhungte rawn hruai turin an kohsak mai thin. Driving Licence hi chi hnih a awma Proportionary (6 points) leh Full Licence (12 points) tiin an then a. Alcohol Breath Test-a an man fo tawh te (record hi an Licence ah a awm vek a ni) leh Speed limit over vanga an man te chu an man tam dan a zirin an Driving Licence Point kha a tlem ve tial tiala, an man zing lutuk chuan an Point (6 or 12) kha a zo thaka Licence an laksaka Motor khalh thei lo in an awm thin a ni. Licence nei lova Motor an khalh luia an man fuh chuan kum 3 chhung Licence neih an khapsak bawk thin. Motor lo chuan hna a thawh theih lova, hna thawh loh chuan ei tur a awm si lo tu te pawn Licence laksak chu an hlauh ber a ni.
Ti chuan, Point la nei tho si Alcahol Breath Teste-a an man fo te tan “ Zu rim hria thei khawl” (Interlock Devices tia an koh) chu an Motor khalhna bulah an vuahsaka an khalh dawn a piangin an hama Zu rim an lo nam chuan an Motor engine chu a nung (start) duh tlat lo bawka, kawnglaiah pawh chu khawl chuan a duh duh hunah min ham leh rawh ti ni awm hian a rawn kiu vak vaka a ham loh chuan Motor engine chu a thia, a ham nawn leha Zu rim a awm loh chuan tha takin a tlan ve leh mai bawk a. Zu rim nam changin thiante han ham tir mai a theih nain kalna tur apiangah min zui a ngaia (a chhan chu a duh duh hunah khawl khan min ham leh rawh a rawn ti mai zel) Police in min man fuh palh a nih chuan a aia nasa zawk hremnak chu bel chhung sa ang a ni.Ti chuan, chutiang ‘Zu rim hria thei Motor’ chu thla 6 atanga kum 1 chhung an khalah Zu rim nam miah lova RECORD a awm chuan Traffic Police ten Full Licence chu an pe ve leh maia Interlock (Motor khalh dawn apianga ham) pawh chu an phelhsak leh thin a ni. He Interlock hi thla khatah $ 135 vel senga thla tin tih nun tir a ngai ziah bawk a ni.
Russia rama Zu rui chunga Motor i khal an man che chuan dam chhung Driving Licence an laksak ang che, England ramah chuan kum khat lung in tang leh Driving Licence laksak bakah 250 i chawi bawk ang, France ramah chuan kum khat lung in tang leh kum thum chhung Driving Licence laksak leh 1000 chawitir i ni anga, Poland ramah chuan lung in tang, pawisa chawtir leh Motor khalh atir atang zir nawntir i ni ang, Norway ramah chuan kart hum chhung lungin tang leh pawisa chawitir i ni anga a tul dana zirin kum nga chhung i Driving Licence an hlihsak ang che, Bulgaria ah chuan i nunna thleng a hlohawma, Finland leh Swenden ah chuan kum khat chhung Public hna thawhtir i ni bawk ang, Mahse Burma ramah chuan Zu rui chunga Tahan atang Tiau thlang i khalh theih chuan Tiai ah arsa leh Zu i ei teuh ve thung anga tui takin i mu ang. Ram danga Motor kan khalh chuan pit pi (horn in pek) min pek chuan kan zaka kan thin a rim thin, Tahan a Motor i khalha i pit pi loh chuan a zahthlak leh lawi si a ni.
Aw le, keini ang thal khaw luma an-hling hang hawp hluah hluah thin, be-hlawi huna zing lama a kan tlai lama chhawh-chhi nena bawl, favang leh buh zah ni khuaah pawh sa dang lei ve thei lova mahni ran neih chhun varak (mandali) talha a leh pek sa ei hun tur Xmas ni nghak leh tawp thin tan zawng he ‘Zu rim hria thei Motor’ (Interlock) hi Printing Mechin-a USB va hawlh luh zeuha Booklet a kilhsa a a lo chhuak zung zung mai tih loh ah hi chuan a mak danglam em ve bawk a ni. Ka PYF (V/Ch) member pui ten hriatzauna a tan in lo hmang ve hlauh takin ... Duhsakna nen!!! (Melbourne 3:37AM 90811)
No comments:
Post a Comment