“Lengkhawm Zai”

                                                                                                By; The Sai (Tuallawt)

Mizote mizo bikna riau a lan chhuahna pakhat chu Lengkhawm zai hi a ni awm e. Khawi hmun leh rama kan thlen pawhin kan zinga lusun khawhar kan awm chuan lengkhawm hlain kan in hnema chu chu hnam dangte zinga Mizo danglam bikna pawh a ni reng a. Lengkhawm zai hi kan unau hnam dang ten an nei ve tho nain lusun khawhar te kan inhnemna ang chi ‘lengkhawm hla Or khawhar hla’ bik erawh an nei chiah lo (tun hnuah erawh Mizo khawhar hla atangin letlingtu an awm pheuh pheuh). Chuvangin Zo nun leh lengkhawm zai hi a in kawp tlata Zonunmawi par chhuahna chi khatah pawh kan ngai thei awm e.

Lengkhawmnaa zai tui tur hian mipui tam leh tlemah a in nghat lova, mi tlem te pawh tui takin an zai thei thova mi tam tak pawh nise tui mang lova zai a awm ve thei tho bawk a ni. Melbourne khawpuiah pawh ‘lenkhawm zai’ hi lusun khawhar inah kher nilo in pawlhonaah pawh kan zai ta fova kan tlem ngaihtuahin kan tui thei viau maia a nuamin a hlim awm hle a. Tun aia kan zai tui theiha hma kan lo sawn zel theih nan Lengkhawm zaia a hnukpui chelhtu ‘Khuangpui pu’ leh ‘Hla hriltu’ te chanvo leh mawhphurhna a ka ngaih tlem han sawi ve ka duh a ni.

Khuangpui pu: Lengkhawm zaiah hian Khuangpui leh khuangte tiin khuang chi hnih a awma a hmun leh ramin a zir lohnaah chuan Khuangpui leh khuangte tih a awm ve hran loh avangin tuna ‘Khuangpui pu’ ka han tih pawh hi ‘Khuangpu’ a ni ber mai ang chu. Khuang pu chungah hian lenkhawm zai tui leh tui loh a in nghat ber avangin khuangpu mawh phurhna hi a lian hle a ni. Chuvangin lengkhawm hla thiam leh zai tuimi na zawng hian khuangpu nih a theih lova a phur phur tana tih mai chi pawh a ni bawk hek lo. Khuangpu tana hriat tura ka ngaih pawimawh then khat han tar lang ve ila...

·        A tawk chauha (a sang leh hniam) hla lak thiam

·        A hla sak (a rang leh muang) leh a khuang ri in miltir thiam

·        A hla san lam Or hniam lam leh khuang ri in miltir thiam ( Zawitea hla saka ring taka khuang vua leh ring taka zaia zawitea khuang vua leh lawi si ang chi)

·        Hla in mil a dawta sak tur thlan thiam (Tuna kan Melbourne din hmunah chuan Hla kan thiam rual vek loh avangin mipui thiam rual tur hla ni tho si a dawta sak leh tur thlan thiam hi a pawimawh zual bik)

·        Hla sak tui laia pawnchhuah loh ( Hla sak tui laia Khuang pu ber a chhuak zuk thin hian hla sak tui lai a ti bo thei)

·        Mipui tana thaw lak hun siam rem sak thiam (hla khat leh hla khat inkara rei lo te chawlh ang chi)

·        A tawk chauhva fiam thu thawh ( Lenkhawmnaah hian mipui mit chu Khuang pu chungah a fu fura nula fiam zawk zawk ang chi te Khuangpuin mipui fuihna thu sawi ve chhen ang chi te hi thil tha viau ang mah se a mawi lo duh khawp!)

Hla chang hriltu; Lengkhawm hla bahlah lova tluang taka an zai theihna tura mawhphurtu chu ‘Hla hriltu’ hi a ni awm e. Lehkha ziak erawh chhiar a ni a hla erawh an hril thung a ni. Chumi awmzia chu Hla hi (kan sak lai chuan) chhiar tur a ni lova a hrila hril tur a ni. Hla hril awmzia chu a chhiara chhiar puat puat leh a sawia sawi thuak thuak a ni lova ‘thluk’ nei deuhva aw-ki siam hi a ni awm e. Mizo tawng chhiar thiam na zawngin hla an hril thiam lova, Hla thiam leh hla hria mi na zawngin an hril thei bik bawk hek lo. Hla hriltu te tana hriat tur pawimawh ka tih then khat te han sawi ve leh ila...

·        Khuangpuin hla a lak zawh vea hril zawm theih a tha

·        Khuang leh khuangpu aw mila hla hril thiam a pawimawh ( Hla sang tak sak laia zawitea hril Or Hla hniam deuh sak laia sang/ring taka hril, Khuangpuin ring deuhva a vuak laia zawitea hla hril ang chi)

·        A tawk chauhva hla lak nawn thiam ( Khuangpu hian an mahin hla an la nawn mawh khawpa hla lak nawn hi hla hriltu mawhphurhna a ni. Mahni hla duh zawng a nih vanga hla lak nawn fote, mipui thiam rual loh hla lak nawn fote hi fimkhur a tha. Chutih rualin mipui zai tui dan dinhmun thlir renga hla lak nawn thiam hi a pawimawh bawk a ni. Zai tui viau mah ila Hla chang 5/6 nei ang chi hi chu a tir atanga lak nawn kher loh a tha bawk)

·        A theih hram chuan Khuangpu bula thut theih a tha ( Khuangpu leh hla hriltu karki taka thut hian zai a ti tui mawh)

·        Mipui hnenah hla thlanna hun siam/hawng thiam a pawimawh (A hun leh hmun nena inmil lem lo mipui zing atang hla thlang an awmin hla hriltu ni lovin Khuangpuin a khap a mawi)

·        Uarna siam thiam a pawi mawh ( He ta uarna ka han tih deuh bika hi chu hla changthua awm lem lo tehkhin nan Aww, Haleluia, Amen tih ang chi te hi kan thiam rual hlaah chuan han telh zeuh thiam a tha)

·        Hla hriltu nui uar uar leh mi melh zuk zuk chingte tawngtai laia lo meng kuaute hi a mawi lo hle.

Tin, lengkhawm zaiah hian mipui te pawh kan pawimawh hle. Khuangpu hla laksa lo lak nawnsak te hla hriltu hril tui lai lo chhawksak tum ve phet te hian zai a ti tui lo. Khawhar ina kan len chhan ber pakhat chu khawhar chhungte lunglen ti bo tura zai-hla hmanga zaiho a nih rual rualin ‘Lusunte hnemtu’ buatsaihtu chuan khawhar chhungte mittui thla zawih zawih khawpa kan zai theih hian lenkhawm a hlawhtling a ti ve tlat. Awle, Zai lovin kan awm thei si lova lengkhawm lovin kan awm thei bawk hek si loh avangin a chunga ka han tar lan tak tlemte khin tangkaina a lo neih palh takin.....