Kannih Laimi hi Pathian thluasuah coin kan ram din hmunin a zir lo fawn thawn hmun tin ram tinah kan thleng. Hrek khat cun hmasawn le thansonak nasa zetah kan hmang ih kan umnak ram ih ti dan ciau te te tla zir tul mi le zir ding a tam vivo.
Cuvekin kan umnak ram ih tawngkam mawi te te tla hi kan zir thiam a thupi zet. Kan Lai ram ah cun kan inn hnen kiangkap in hanghnah hangrah te te in pek khal ah lungawi ti hnak in ‘ nangmahin Coka ah i hun ret sak law law aw’ kan ti men theu. Asinan, tu kan umnak ramah cun ziang khal hun rel sela “ Thank You” ti zel a si.
Curuangah kan kiangkap kan umnak ram neitu pawl ih tawng mawi mi te te “ Ka lungawi” ti hi tu hnak in kan uar sawn a thupi zet. Kan fa le siseh kan nupa par khalah “ Ka Lungawi “ ti hi kan hman thiam a tul zet. Kan Lai ram dan te cun zo hmanin kan fa le parah “ Ka lungawi” ti a um dah lo. Asinan, kan kiangkap mirang pawl cu an fa le hnen khalah “ Thank You” an ti thei ring ring a si.
Cuvek tho thoin, ‘Sorry’ ti tawngkam tla hi a thupi zet. Kan tuah dik lo mi, kan ti dik lo mi, kan theih sual mi le kan palh mi pawl par ih “Sorry” (ka ti pang a si) tin kan ti thei hi a thupi zet. Na fa le par khal ah na tuah dik lo le na sual pang mi a um a si khal len “ Sorry” tin ti mai aw la cu cu a ngaitu hrang khalah ngai huam zet tawngkam a si.
Zo zo khalin hi tawngkam pahnih “ Thank You le Sorry” ti te hi hman uar le zuam ciau uh si... Aw le, FCCM khalin kan tlin lohnak le tuah palh mi parah ‘Sorry” ... In duhsaknak parah “ Thank You”.....
No comments:
Post a Comment