Rev. Richard Johnson in Hunter le Bligh (Sydney) lam zin sir ih leitlak thawn Biak Inn a rak sak mi Australia ram ih Biak Inn hmaisa bik an sak kum ihsin siar cun tu hi kum 218 nak a si. Cui kum cu 1793 a si ih Laimi in Christian kan si hlan kum 100 lenglo ah Australia ah cun Biak Inn an rak nei daih zo tinak a si.
Australia ah Biak Inn neih a tul lo, mirang pawl ih Biak Inn ah khawmnak ding a tam tuk kan ti men thei! A si, cu cu thu dik a si nan cu vek tho thoin Australia ah inn neih khal a tul lo mirang pawl ih in hlang/san ding a tam tuk kan ti sal a si len a dik thei nawn lo ding. Mai umnak inn ding hman thupi ih kan ruat cun Amah Pathian ziang tin kim in petu kan fak le biaknak ding Inn cu ziang tlukin a thupi ding! Mai ta a si mi inn ih um a nuam vek tho thoin mai ta a si mi Biak Inn ih khawm tla a nuam. Mi inn hlang ih um a hreh um vek tho thoin mi Biak Inn hlang ih khawm tla a har zet.Cui dinhmun cu theithiam in kan ECCM hruaitu upa pawl cun hmai lam can saupi ruatin kan te-sin fa pawl hrang Biak Inn kan neih theinak ah tin “Building Committee” cu mipi zate lungkimnak thawn din suah a si.
Ahmaisa bikah Biak Inn hrangah mipi lak ihsin sum hawl dan ding cu huphurh zetin Pathian hnen ih thlacamnak thawn ‘Building Committee’ cun thu rel khawmnak a nei, Pathian in member lak ihsin ruatnak tha tha tla a pe ih a lungawi um zet. Committee pawlin nasa zet ih an ruat hnu ah tui kum hrang ‘Building Fund’ hawl dan ding ih an tim tuah mi pawl cu One Day a Dollar (ni khat fangkhat) Bawmte zem, Kohhran member pawlin an pek thei ciau zum mi sumpai bi-tuk sak, Lai rawl suan ih zuar, Farm feh, Gospel Concert neih pawl tla an si. Committee pawlin an tumtah mi hi fehpi rero a si ih tu kan thlen cinah Kohhran nu le pa pawl ih lungkimpinak tampi kan hmu ih a lungawi um zet. Bawm te ih ni khat fangkhat thlak mi tla nu le pa tam sawnin nan fa le nan rak thlak ter ring ring theu mi kan theih tikah Pathian kan thangthat a si. Nan pekmi a lak lo ding.
Kohhran member sungah inn tin an mah le pek thei tawk ciau ding ih kan zum mi sumpai zat bithliah mi cu ca-eih in thlacamnak thawn in tin zem sal a si. Kohhran nu le pa pawlin huam aw zet ih nan pekawknak kan hmuh tikah a lungawi um ngai ngai. Nu Hlawn Bawi rori in harsa te ka si nan Biak Inn saknak hrangah cun rawl hmeh sia deuh tla ka ei mai ding ti tiang ti ngam khawp ih a pekawknak tla a ropi zet. Hna tuan lei lo te te inn sungsang pawl tlain “ a thawk pekah cun pek ding hi kan huphurh zet nan tu ah cun thlacamnak thawn Pathian Biak Inn hrangah pek thei rori kan tum” ti tu tla nan um ih a lungawi um zet fawn. Tui na pawisa neih kha zo si lo pe tin lo sut bang sela nauhak te khalin Pathian tin a lo sim ding. Na fa le sweet na sum ih pakhat te na dil tikah pe siang lovin an lo dung tun a si len cu a dang pek duhnak thinlung na nei lo ding, asinan siang zet ih an lo pek a si len a hnak ih tam pek duh salnak thinlung na nei ding. Pawisa in petu Pathian khal kan pek siang sal dan ih zirin tam sin in pe thei tu a si.
Pathian malsawmnak zarah kannih Laimi khal Australia ram ih kan rak thlen ve ten kanmah le tawng ciau in Pathian biaknak kohhran te te kan ding. Rev. Richard Johnson khan Biak Inn a rak sak thawk lai ah tun hnu kum 200 lengah Laimi pawl tla in Australia ah Biak Inn sak an ra tum ding ti cu a thei cia lo ding nan ziang kim theitu le timtuah tu Pathian thil rel dan hi a ropi a si. Biak Inn (Kohhran) a thupi lo, Kohhran ah run damnak a um lo na ti men thei, Asinan Pathian in Biak Inn (Kohhran) ih um lo le Kohhran a nei lo tu cu a run dam lo ding. Biak Inn saknak hrang ih sumpai a pe tu hmuah hmuah Pathian in a let tampi in thluasuah lo pek hram seh...
No comments:
Post a Comment