Burma rama Election chanchin tlem thlirna

By: The Saia, Australia
Ram ni tla seng lova roreltu British Emperor chuan a tum thumna atana a siruklaa a rawn thawhchhuah hnuin Burma ram pumpui chu kum 1885, November thla atangin British kut hnuiah kan lo awm ta a; tichuan a chhehvela ram te te, Chin, Kachin, Shan, etc.. te pawh Burma ram chhungah senglutin Rangoon atangin a awp a. Tichuan, kum 63 chhung British thuhnuaia kan awm hnuin January 4, 1948 khan independent hmuin Burma ram chu mahnia ro inrel thei ram kan lo ni leh ta a ni.

Burma rama inthlanpui neih tawh te:
April 1947; Hei hi, Independent kan hmuh hma lawka Burma ramin inthlanpui a neih hmasat ber a ni a, he inthlanpuia hnehna changtu party chu a taka Independent puan a nih hnuah Sokarna chelhtu turte an ni a. Gen. Aung San-a kaihhruai; Anti-Fascist People’s Freedom League (AFPFL – Phah-Sah-Pah-Lah) chu a ram mipui duh ber a nih avangin Assembly seats 210 chhungah seats 176 hmuin hnehna a chang ta a, Karen Party-in seats 24, Communist Party in seats 6 leh Anglo-Burman ten seats 4 an chang a ni.

Chutichuan Gen. Aung San-a chu hetih hunlaia British Governor hnuaia Burma Sorkar, Executive Council of Burma ah thunei ber a lo ni ta a. Governor-i’n direct-a a awp mek, British ten Burma ruala Independent pek an tum loh, Chin, Kachin, Shan ramte Burma Sorkar rorelna hnuaia awm an duh chuan Burma-in Independent a hmuh hunah zalenna an hmuh ve nghal theih dawn avangin Gen. Aung San-a leh Tlangmi hruaitute chuan February 12, 1947 khan Panglong Agreement ziakin tuna Burma ram hi din a lo ni ta a ni.

Tichuan, September 24, 1947 ah Burma Constitution chu nemngheh a nih hnuin Burma ram chu January 4, 1948 ah Independent rama puan a ni ta a. Amaherawhchu, Election-a hnehna changtu Gen. Aungsan-a leh a thuihruaite chu phiarrutute kut tuara tih hlum an nih hlauh avangin AFPFL Party hruaitu nihna chu U Nu-a’n a chang ta a, tichuan Burma ram chuan U Nu-a hruaina hnuaiah Parliamentary Democracy system chu kan hmang tan ve ta a ni.

June 1951-April 1952; Hei hi, Burma ramin Independent kan hmuh hnua inthlanpui hmasa ber kan neih tum a ni a. Burma ramin Independent kan hmuh phat atang khan a ram chhungah buaina chi hrang hrang kan nei zui nghal a, Karen State-i’n Burma ram atanga indan/inlakhran a duhna chuan a ram chhungah buaina nasa tak a thlen a, chu chuan he inthlanpui hi nasa takin a ti khaihlek bawk a ni. Kumpuisul meuh a vei hman tep hnuah a ram chhunga buaina chi hrang hrang karah inthlanpui chu buatsaih a ni ta tho a, U Nu-a hruai AFPFL Party chuan Assembly seats 250 chhungah seats 147 changin hnehna a chang ta a ni.

27 April 1956; Kum 1947 Burma Danpui angin Parliament Assembly chu Chamber of Deputies leh Chamber of Nationalities tia then a ni a. Chamber of Deputies inthlanah hian seats 250 chhung atangin seats 202 thlan tur a ni, seats 48 erawh eptu an awm loh avangin AFPFL candidate te hi tlingsaa ngaih an ni. Election Commission ten Burma ram chhung a ralmuan loh em avang leh ram-mu te rikrapna avangin Chamber of Nationalities inthlan hi ti tlaiin May thlaa buatsaih a ni a. Inthlanpui hma lawk hian National United Front (coliation/ngiau-paung) chu Dr. E. Maung-a kaihhruai Justice Party, Burma workers and Peasants Party (Taung-tu-le-tama), Thein Pe Myint-a kaihhruai People’s Unity Party, People’s Peace Front leh Party dang tenau tangrual chuan an din a. Mipui ngaihven pawh a hlawh hle a, mahse inthlanpuiah meuh chuan seats 48 chauh an hmu a, Party dang dangin seats 55 hmuin, seats 147 hmutu AFPFL, U Nu-a kaihhruai chuan hnenna a chang leh ta a ni. U Nu-a hruaina hnuaiah kum 10 dawn kan awm ta a, U Ne Win-a phakar leh suahsual a lo lang tan a, Burma ram Politics dinhmun pawh nasa takin a rawn buai chho tan ta a ni.

6 February 1960; Ram chhungah buaina chi hrang hrang Party zingah a rawn chhuak tan a, April 1958 ah Sorkar chelhtu AFPFL Party chu ‘Clean’ leh ‘Stable’ tiin hmun hnihah a keh a, Clean AFPFL (Tan-sin-Phah-Sah-Pah-Lah) chu U Nu-a’n a kaihruai a, Stable AFPFL chu U Kyaw Nyein leh U Ba Swe ten an hruai bawk a. Mahse, Communist helte buaina siam a sosan zual zel avangin Army Chief General Ne Win-a ho Sipai chuan October 1958 khan Sokarna an chelh lailawk a, Ei-Saung Asoe-Yah (Caretaker Government) tia hming invuahin April 1960 thleng kha General Ne Win-a Sipai Lalna hnuaiah kan awm ta a ni.

Tichuan, 1960 ah chuan ram inthlanpui buatsaih leh a ni a U Nu-a hruai Clean AFPFL bawk chuan Parlaiment seats tam ber hmutu niin seat 149 a hmu a, Stable AFPFL chuan seats 30 hmuin NUF Party erawh chuan kum 1956 tum ang lo takin seat khat mah a chang lova; Party dang dangten seat 4 an hmu bawk a, Sorkarna chu U Nu-a chuan a chang leh ta a ni. Amaherawhchu, Panglong Agreement atanga Burma-a tel Tlangrammi Chin, Kachin, leh Shan ten State thuneihna chak zawk Federal inkaihhuai dan diktak hmang tura ngenna thu putluh an tum chu Burma ram kehdarhvekna hmahruai anga chhalin March 2, 1962 ah General Ne Win-a chuan U Nu-a Sokarna chu paihthlain kan ram chu Sipai rorelna ‘Revolutionary Council’ hnuaiah a dah ta nghal a. Tichuan, General Ne Win-a chuan 1974 kumah Revolutionary Council chu thiatin ‘Burma Socialist Program Party – BSPP’ dinin 1988 thleng ro a rel ta a ni.

27 May 1990; Hei hi, kan ramin Independent kan hmuh atanga inthlanpui a vawi lina a ni a. Chu chu 1962 kuma U Ne Win-a’n Sipai chakna hmanga kum 30 deuh thaw min awp hnua inthlanpui kan neih leh theih hmasa ber a ni. 8/8/88 kuma mipui thinrim kawngzawh chuan 1990 Election chu a hring chhuak ngei mai le. A nu damlo rawn kan tura lo kal Daw Aung San Suu Kyi-i chuan kan ramin hruaitu tha a mamawhzia a tak ngeia a hmuh hnuin National league for Democracy (NLD) Party chu a thurualpuite nen an din ta a ni. Tichuan, general election chu buatsaih ngei a ni a. Daw Aung San Suu Kyi-i kaihhruai NLD chuan mipui thlawpna nasa tak hmuin Seats 492 chhungah seats 392 hmua hnehna a chan laiin, U Ne Win-a policy thlawptu National Unity Party (NUP) chuan seats 10 chu a chang ve trawk a, a dang zawng chu regional party hrang hrang ten an chang ve bawk a ni.

Awle, puithu-na atthlakin a chiahzawp mek Sipai Sokar ten vanneihnaa an ngaihruat number 9-in a hual khah tlat 27 May (27= 2+7=9, May=Sunday vawi 4 na+ thla 5na= 9) chu an (Sipar Sokar) tan chuan lungchhiatna ni a lo ni zawk a ni. Kan hriat theuh angin hnehna changtu NLD Party chuan hnehna par tlan thei lovin; Sipai Sokar chuan rorel theihna a hlan duh ta lova, mipui thlantlin Member of Parliament (MP) tam tak lunginah a khung a, thenkhat house arrest (hrenbehna) hnuaiah a dah bawk a. Tichuan, kan ram Politics chu hmasawn a hnekin a hnungtawlh zawngin kan thrang a, mipuiin nasa takin kan tuar bawk a ni.

7 November 2010; Kumin hian Australia leh Burma ah Election neih ve ve beisei a nih laiin Australia chuan August thla khan a zo fel tawh a, Burma ramah erawh Nov. ni 7 khian neih tur a ni. Australia ramah chuan kum 4 danah Election hi neih a nih laiin Burma ramah erawh chuan kum 20 hnuah a vawi khatna tur a ni.

Tuntuma inthlanpui buatsaih tura Sipai Sorkarin a duhthusam ang chiaha a duan lawk Danpui hi khawvel ram hrang hrang te leh mithiamte sawisel a hlawh hle mai a, chung zinga sawisel hlawh langsar ber pakhat chu 25% Parliament seat chu Sipai ten an changsa tur hi a ni a, chu chuan he Danpui hi Sipai rorelna a ngheh sauh sauh theina tura Sipai Lalho duhthusama duansa a nihzia a ti lang chiang em em a ni. Tun inthlanpuiah hian Party hrang hrang 47 ten dilna an theih lut a, chu’ng zingah Party 42 te chu Election Commission ten an pawm hnuin, Party 5 te chuan inhnukdawk lehin Party 37 te chu kumin inthlanpuia tel tur te an ni.

Kumina Member of Parliament (MP) inthlan dan tur chu tiang hian a ni …
Total member of Parliament(MP) 664, (Pyituh Hluatdaw MP 440 + Amyota Hluatdaw MP 224) Pyituh Hlut-Daw (People’s Assembly) MP – 440, Pyituh Hluat-Daw (People’s Assembly) ah MP seats 440 a awm a; Danpui angin Sipaiin 25% seat a hauhsa avangin MP 110 (25%440) seats chu Sipai ta tur a ni sa a, mipui thlan tur erawh seats 330 (440-110) chauh a ni ta a.

Amyota Hlut-Daw (National Assembly) MP 224, Amyota Hluat-Daw (National Assembly) ah hian MP seats 224 a awm a, Danpui angin Sipaiin 25% seat an laksa avangin MP 56 (25%224) seat chu Sipai ta tur a ni a mipui thlan tur erawh seats 168 (224-56) chuah a ni.

Danpui angin Seat 168 chu State or Region pakhatah MP 12 theuh pek an ni. Burma ramah State 7 a awm avangin MP 84 (7×12=84) a ni ang a, Region 7 a awm bawk avangin MP 84 (7×12=84) a ni bawk dawn a ni. Burma ramah tlangmite (Taying-yin-ta) chenna zawng zawng chu State tih a ni a, Tlangmi hnam 7 te chuan MP 84 kan nei ang a; Division 7 Kawl hnam khat chuah chenna erawh chuan MP 84 an nei ve thung dawn a nih chu !!!…

Chin State leh Kawl phai (Kalaymyo District)
Chin State-ah hian inthlanpuia tel tur Party pali an ni a, chungte chu:-
1. Chin National Party (CNP)
2. Chin Progressive Party (CPP)
3. National Unity Party (NUP) leh
4. Union Solidarity Development Party (USDP) te an ni.

Kawl phai kan tih mai Kalaymyo District chhunga Party leh an candidate tur te chu

Parties	Amyota Hlutdaw	Pyituh Hluatdaw	Region Hluatdaw(I)	Region Hluatdaw (II)
CPP	U Khin Maung Yi	Pu Khawtuahlala	Pu Khaw Tin Thang	Pu Zam Khen Thang
USDP	U Thein Hlaing	U Tin Hlaing	U Sein Win	U Khin Maung Than
NUP	U Mya Pye	U Aung Moe	U Kyaw Myint	U Pye Tin

5. Chin tain-yin-ta Hlutdaw (Chin quota)CPP – Pu No Than Kap
USDP – U Cin Lian Mang
NUP – U Cin Za Pum
Sources: wekipedia, chinworld, singaporemizoblogspot, mizzima