Calai Duum

Hi leilung ih suak minung hmuah hmuah hin kan dung lam kan hmuh hlat thei hnak ih hla kan hmai lam khal kan hmu hla thei cecuang lo. Khat lam zawng ih rel cun, kan dung lam kan hmuh hlat thei dan ih zirin kan hmai lam khal hla pin kan hmu thei a si. Cuiruangah dung lam can saupi a liam cia mi hmu thei tu cun cui a liam cia can ihsin a hmuh le tawn mi fimnak ruangah a ra lai ding mi hmai lam can khal saupi a hmu cia thei a si. Thimnak ah kan dung ih a lam liam cia kum 100 thu hman rel thei lo Laimi pawl hnak cun kum 600 liam cia rel thei tu English pawl cun a ra lai ding mi hmai lam can khal saupi an rel thei a si. Cui hmai lam can a ra lai ding mi hmu thiam tu, cui mi hrang ih timlam thiam tu cu hi leilung ih mifim kan ti mi hi an si.

Hi lei minung hi miphun upa le miphun nauta tin kan then aw.A ngai ngai cun kan suahkehnak a hram thawk ten kan zingzawi a si len miphun upa suahnak hmun khat Eden duum sung lawng ihsin ra suak theh kan si. Asinan, a ngai ngai ah cun miphun hmuah hmuah hi miphun upa kan si theh fawn lo. A si len, zo vek miphun si miphun upa kan ti ih zo vek pawl si miphun nauhak deuh ih kan ruat? Miphun pakhat cu a suahkehnak rei zet zo khal sela a suahnak rei zet thu theih theinak Calai a neih loh cun cui miphun cu miphun nau(hak) kan ti thei ding. Asinan, tubai te ih ra suak miphun cu Calai felfai te nei ih can a hmang liam vivo a si len suahnak reipi miphun Calai nei lo hnakin khua rei hlan ah mi ih miphun upa ti a ngah sawn theu. Cuiruangah kan miphun hi miphun upa si kan duh ih hmai lam can thlir thiam tu miphun si ding cun Calai ah thrangso dingin napin kan zuam a tul a si.

Curuangah Calai kan thrangso lawng len kan miphun a dam ding ih miphun thrangso kan si thei ding. Calai tel lo miphun cu miphun thi a si, AN TI. Miphun a thih zo zo hnu cun a dam suak salnak hrangah cui miphun lak ihsin tuu suan sarih sung nghah hman ah a dam suak sal har zet ti a si. Nang le kei Falam Laimi kan miphun dam suahnak hrampi cu Pathian a si ih cui Pathian ih in pek mi kan Calai khal a si fawn. Eden duum sung ih ti le rawl, thei rah a phun phun cu dam suahnak a si vek in hi Calai duum sung ih Literature ti le rawl phun phun cu kan dam suaknak ding a si.  Kan miphun dam suah na duh ve a si len " Calai dumm" (Literature Garden) ah rak leng ve aw tin Lai Bangla ( Lai Guest-house) in a lo sawm ring ring.