Zing khat cu kan Nu ka tih ruang si lovin rawl hmeh ding kan neih nawn loh sawn ruangah hmeh lei dingin Boxhill ah ka va feh. Croydon Train Station thlen hlan te ih thingkung hnuai ah Mirang pakhat le Laimi pakhat hi ka hmu ih an tawng cu fiang ten ka thei ngah lo nan to-aw zik zik vek thu sim aw hin an um lai ka va hmu.
An kiangnai zawn ka thlen hnu ah Laipa tawng pakhat te ka theih ngah mi cu “I wouldn’t split anymore, my Boss” tin a vun sim cu ka thei. Cutin, ka thinlung te cun ‘Khai mirang pa ke par ah cil a phui ngah pang maw?’ Maw? Laipa cil phui a hmuh hrim hrim kha a duh lo sawn si ding tin lam zin tluan in ka ruat rero. Cu tin Rail sung ka lut cu ka kiangte ah Laimi nupi nu pahnih hin ring zet ih tawng buanbo phah hin Kuber ( Sah-Dah) an hmuam lai fang hi ka va hmu ngah sal la la. An nih cun ziang an ruat lo nan keimah riangri sawn in an Sah-Dah phuinak ding ruat in ka rak buai.
Kannih Laimi hi kan ram that loh nak thawn Pathian thluasuah co in ram tin hmun tin ah kan thleng. Kan thlennak kip ah kan mizia te “hmawm te-reuh le ei te-reuh” khal kan thlengpi cih vivo. Remcang lo cing khalin kan hmuam ih mawi lo zet khalin kan ei tho tho. Kan ei le hmuam dan lawngte mi dang hrang ih zauh mawi lo zet a um thei. Cui ruang ah mi ram ih kan um cun kan nun ral rin a tul ih mi dang mizia tha le mawi kan cawn thiam khal a thupi zet. Mi za ran hnuai lam deuh pawl pahnih/khat lawng Kuhva ei kan um ih kan Kuhva ti sen tleng tleng tla hi a phui dan kan thiam a thu pi zet.
Kan pu-pa san ih Lai nun mawi kha khui tawk ram le hmun, miphun dang lak ah kan thleng a si khal len nghilh siang lo teng kan thlun ring ring thei hi a thupi zet a si. Hmuan le ei te-reuh kan tuah a si khal len fim khur zet ih kan tuah thiam a thupi zet. A ei lawng thiam lovin a phui lam tla kan thiam a thupi zet fawn. Cu lo len cu a rei hlan ah “ Ka phui nawn lo ding, Ka Pu” kan ti ve pang ding!
No comments:
Post a Comment